Logo do anunciado na Asemblea Xeral Extraordinaria celebrada o pasado 17 de maio, a Xunta Directiva da Plataforma Ulloa Viva atendendo aos artigos 19.1 e 20.1 dos actuais e vixentes Estatutos da Plataforma Ulloa Viva convoca Eleccións aos cargos da Comisión Permanente da Xunta Directiva da Plataforma Ulloa Viva. A tal fin, comunícase a todos os socios e socias que o día 1 de xuño ábrese o prazo para a presentación de candidaturas aos cargos de Presidencia, Secretaria e Tesoureira, prazo que permanecerá aberto ata o 15 de xuño (inclusive).

As candidaturas deberán ser presentadas no correo electrónico plataformaulloaviva@gmail.com co asunto “ELECCIÓNS” e acompañadas da seguinte documentación:

1. Solicitude incluíndo nome e apelidos, número de socio e cargo ao que se presenta.
2. D.N.I. escaneado (ou foto), polas dúas caras, en formato .pdf.
3. Declaración de non estar incurso en causa de incompatibilidade, conforme ao art. 19.3 dos Estatutos.
4. No seu caso, documento explicativo da candidatura (segundo o art. 20.1.5 dos Estatutos).

Asemblea xeral

Unha vez rematado o período de presentación de candidaturas e comprobación dos requisitos de validez das mesmas acorde aos arts. 19.1.3 e 20.1.3 dos Estatutos da Plataforma Ulloa Viva, terá lugar a Asemblea Xeral (programada para o sábado 5 de xullo) co fin de realizar as votacións por parte das persoas socias presentes na asemblea.

Nesta asemblea terá lugar, e por esta orde:

• Constitución da Mesa Electoral (artigo 20.1.6).
• Presentación das candidaturas, todas elas contarán cun tempo máximo de 60 min, a distribuír proporcionalmente entre as mesmas. A orde de presentación fixarase por sorteo público.
• A continuación procederase á votación, directa, persoal e segreda, dos cargos por separado por parte das persoas asistentes. (artigo 20.1.7). A tal efecto poranse a disposición das/os socias/os as correspondentes papeletas de votación.

Calendario Electoral (aprobado na reunión da  Xunta Directiva o 26 de Maio do 2025)

• Dia 1 de xuño: Comunicación de Convocatoria Electoral individualizada cos datos persoais e número de socia.
• Do 2 ao 6 de xuño: Subsanación de erros nos datos persoais e/ou número de socia/o a través do correo plataformaulloaviva@gmail.com.
• Do 1 ao 15 de xuño: Presentación de candidaturas segundo art. 20.1.5 dos Estatutos, enviadas ao correo plataformaulloaviva@gmail.com
• Do 16 ao 20 de xuño: Revisado, validación e, no seu caso, subsanación de erros das candidaturas presentadas para o cumprimento dos requisitos esixidos polos estatutos.
• Dia 21 de xuño: Comunicación vía correo electrónico das candidaturas presentadas validadas.
• Dia 5 de xullo: Asemblea Xeral Extraordinaria para a elección da Comisión Permanente da Xunta Directiva.

Datos persoais do censo

Se es socio/a da plataforma e non recibiches información nen os datos persoais do censo, escribe a plataformaulloaviva@gmail.com.