Unha delegación da Plataforma Ulloa Viva, formada polas representantes Raquel Fernández e Alicia Vilar, mantivo este mércores unha reunión coa Ministra de Sanidade, na que se trasladou a profunda preocupación social e ambiental ante o proxecto industrial da empresa ALTRI, que pretende instalar unha macrocelulosa na comarca da Ulloa.
Durante o encontro, a Ministra expresou o seu respaldo ás demandas da veciñanza da Ulloa, recoñecendo a lexitimidade da loita social pola defensa da saúde, a terra e a auga. A representante do Goberno amosouse sensible ao impacto que un proxecto destas características pode ter sobre a saúde pública e o medio ambiente.
Raquel Fernández e Alicia Vilar, en representación da Plataforma Ulloa Viva, valoraron moi positivamente este achegamento institucional:
“É esencial que os poderes públicos tomen conciencia do que está en xogo: o futuro das nosas comarcas e a saúde das persoas. A visita á Ministra foi un paso máis para facer valer os nosos dereitos.”
Desde Ulloa Viva considérase fundamental que o Goberno do Estado escoite as voces dos territorios ameazados por proxectos contaminantes. A loita contra ALTRI é tamén unha defensa do dereito á saúde, á vida e á continuidade das comunidades rurais.
A Plataforma anima á cidadanía a seguir colaborando na campaña de financiamento colectivo activa en Goteo.org, que busca dotar de recursos á defensa xurídica das veciñas.